کمال کیا ہے؟

۔۔۔۔۔۔۔۔۔کمال کیا ہے؟؟۔۔۔۔۔۔۔۔۔۔

خزاں کی رُت میں گُلاب لہجہ
بنا کے رکھنا ۔ ۔ ۔ ۔۔۔۔۔۔
کمال یہ ہے

ہوا کی زد پہ دِیا جلانا
جَلا کے رکھنا ۔ ۔ ۔ ۔ ۔ ۔ ۔
کمال یہ ہے

ذرا سی لغزش پہ توڑ دیتے ہیں
سب تعلق زمانے والے
سو ایسے ویسوں سے بھی تعلق
بنا کے رکھنا ۔ ۔ ۔ ۔ ۔ ۔ ۔ ۔
کمال یہ ہے

کسی کو دینا یہ مشورہ کہ وہ
دُکھ بچھڑنے کا بھول جائے
اور ایسے لمحے میں اپنے آنسو
چھپا کے رکھنا ۔ ۔ ۔ ۔ ۔ ۔ ۔
کمال یہ ہے

کسی کی رہ سے خدا کی خاطر
اٹھا کے کانٹے، ہٹا کے پتھر
پھر اس کے آگے نگاہ اپنی
جھکا کے رکھنا ۔ ۔ ۔ ۔ ۔ ۔ ۔
کمال یہ ہے

وہ جس کو دیکھے تو دکھ کا لشکر بھی لڑکھڑائے ، شکست کھائے
لبوں پہ اپنے وہ مسکراہٹ
سجا کے رکھنا ۔ ۔ ۔ ۔ ۔ ۔
کمال یہ ہے

ہزار طاقت ہو، سو دلیلیں ہوں
پھر بھی لہجے میں عاجزی سے
ادب کی لذت ، دعا کی خوشبو
بسا کے رکھنا ۔ ۔ ۔ ۔ ۔ ۔ ۔
کمال یہ ہے