سلسلہ تمنا کا

سلسلہ تمنا کا 

خیال و خواب کو اب مل نہیں رہی ہے اماں
نہ اب وہ مستیِ دل ہے نہ اب وہ نشۂ جاں
نہ ٹوٹ جائے کہیں سلسلہ تمنا کا 

جو درد و دل کا تھا رشتہ اسے بحال کرو
نہیں ہے گردشِ ساغر تو گردشِ خوں ہے
سو اپنی گردشِ خوں سے ہی کچھ سوال کرو
ذرا تو سلسلۂ رنگ کا خیال کرو
زوالِ حال کے دن ہیں کوئی کمال کرو 

ہے فصل یاس تو خود کو کوئی فریب ہی دیں
کوئی اُمید دلاؤ کہ آرزو تو رہے
نظر اُٹھے نہ اُٹھے دل ہی کچھ ٹھہر جائے
قدم اُٹھیں نہ اُٹھیں کوئی جستجو تو رہے
ہو چارۂ غمِ جاں کیا یہ گفتگو تو رہے
نہ  پیجیے مےِ حسرت ببانگِ چنگ مگر
کسی کی چشم سے کچھ سلسلہ تو رکھنا ہے
کہ دل کے حال کو پُر ماجرا تو رکھنا ہے
خیالِ ناز و لحاظِ ادا تو رکھنا ہے
جو دل کا خون ہوا ہے اسے بھلا دیں کیا
حسابِ بیش و کمِ خوں بہا تو رکھنا ہے
شبِ دراز جدائی ہے آرزو کی حریف
سو زخمِ شوق کو جلتا ہوا تو رکھنا ہے
نہ ٹوٹ جائے کہیں سلسلہ تمنا کا